甜品配女神 - HeSheEat

約女仔出街，睇戲食飯直落甜品係基本組合，當然，每個細節都應該要精心安排，上網都有教，肯捱麥記既女人萬中無一，搵到直頭要喊出黎，而甜品環節，都唔應該求其搵間許留山，除非你真係好鍾意飲芒椰奶西。

「甘到底約女神去邊度食甜品好?」

對於呢個問題，姐姐有少少私人建議：
1. 約會場地要有特色，方便女神影相時有個靚靚Background
2. 甜品賣相要夠精致，最重要係上鏡好睇，甘先襯得起同樣甜美既女神


例如，好似呢間甘：

首先，室內燈光夠光猛，唔會影到個人黑炆炆。背景方面，有女生最愛既桃紅色，唔喜歡既可以擇灰色磚牆，想再特別少少可以去樓梯位以簡約線條風插畫作佈景，影出黎效果同樣吸引。

甜品上檯前，請體貼地比時間女神去周圍影下裝修同佈置，為併相做好準備。甜品上檯後，請溫柔地等待女神同每個甜品分別黎個可愛3連拍合照，食物放熱/ 放涼左都唔好黑面。

識做既你，可以主動提出為女神楂機，不過要有心理準備，女生既「3連拍」通常係指係300張連拍入面選3張。而進食前，請等埋女神將個張3x3既併相upload上FB同IG呃Like先。

了解左事前準備，跟住落黎我地可以睇下甜品，講下女人。

上：柚子香橙凍 (HK$52)

下：特濃黑朱古力慕絲 (HK$69)

呢度既甜品賣點之一就係層次豐富，咩角度影都甘吸引，加上甜品款式夠多，總有一款啱你個女神。

柚子香橙凍既顏色配搭相當搶眼，底層係淡黃既柚子啫喱，中間用紫紅色藍莓醬撞上亮橙，面頭再加多球雪白既乳酪雪芭，入口感覺輕盈，甜酸度適中，最啱桂綸鎂呢類清新派美女。睇住佢慢慢用銀匙將雪芭放入口，然後笑住細細聲話「好好味 ♥」，真係心都溶化。

特濃黑朱古力慕絲，大廚將72%比利時朱古力變成唔同既形態：朱古力豆，朱古力脆脆，仲有底層香甜濃郁既朱古力慕絲同幼滑朱古力雪糕，香濃而不覺膩，朱古力迷必點。就好似同樣「72變」既蔡依林，總有人喜歡佢既刺激濃烈，就怕你馴服不了。

芒果拿破崙 ($52)

鬆化酥皮配上清甜芒果吉士，香脆可口，而且甜度剛好，食多兩啖都唔覺膩。酸酸甜甜既滋味，就好似跳脫既糖妹，那個天真爛漫的笑容，令人感覺清爽而舒服。

櫻花紅豆梳乎厘 (HK$59)

梳乎厘焗得相當挺身，入口空氣感十足，鬆軟中滲味出陣陣清新櫻花香，味道完全唔人工，可愛既粉紅色甜美外型，脫俗既氣質，令我諗起近期大熱既B餐謝安琪（笑）。梳乎厘底層仲有少量紅豆，可惜份量太少唔多夠喉，旁觀既綠茶雪糕味道唔算濃度，只能輪為配角。

檸檬忌廉班戟卷 (HK$55)

呢間店既招牌菜，香軟班戟皮中內藏自製檸檬醬，面頭淋上拖肥醬同配上一球乳酪雪葩，味蕾遊走於冷與熱、甜與酸之間。雖然佢外表唔係最靚，亦冇用上特別罕有既食材，但配搭之下產生出黎既化學作用非常吸引，令人一吃難忘，就好似我喜歡既翠如BB甘，嘻。

榛子朱古力心太軟 (HK$59)

心太軟流心度唔錯，榛子朱古力醬味道醇厚豐郁，捨棄大路既雲尼拿雪糕而改用椰子雪糕，睇得出大廚有特別花過心思。份量小巧，有動感又夠熱情，點呢款比呀Sa呢類可愛陽光型女生，定能令佢笑顏逐開。

芝士蛋糕泡沫配焦糖日式芝士蛋糕 (HK$69)

芝士蛋糕配芝士蛋糕？你無睇錯，個堆忌廉狀物體，其實係以分子料理所造出黎既芝士蛋糕泡沫，份量十足，完全搶哂旁邊焦糖日式芝士蛋糕既風頭。佢比梳乎厘更入口即化，但又不失芝士蛋糕既纖細甜美，獨特既口感（同賣相），驚喜度十足。

你可以試下點呢款甜品比你個位激似徐子珊但其實係「蝦頭」既女神，然後等睇佢嘟住嘴問：「呢個係蛋糕？」「真係㗎？」「點解嘅？」「你好叻呀！」

HeSheEat，當然要有He同She，你諗好約邊個女神黎食未？

HeSheEat ★★★★★

地址 : 旺角白布街22號藝興大廈地下4號舖

電話 : 5571 3056